【睇片】車尾加個箱 Hitch Hotel停車伸長四圍瞓

文：MenClub Dio
POSTED ON 06 Aug 2018


外國好興揸車去露營，揸到邊瞓到邊實在係爽。不過如果唔係露營車就要拖架trailer，唔方便又危險少少。呢個Hitch Hotel裝置就方便得多，可以當佢係一個冇轆嘅trailer，只要裝喺車尾就得，而且輕到連MINI都裝到......不過當然，如果喺香港裝咗，你要有心理準備，有人會幫你拖，仲拖埋你，不過冇得揀目的地。

呢個Hitch Hotel本身已經係一個大嘅儲存空間，未伸長時有60立方呎空間，可以放到三部單車。用上T6鋁金屬及輕量碳纖製造，而且係防水設計，連MINI Cooper都揹得起。停車後加腳架就可以伸長至7呎，空間有135立方呎，逼逼哋可以瞓到3個人。至於裝備就有頂部通風口及兩個通風窗，之後還可以加USB插口、12V電插頭、照明、冷氣系統等。依家Kickstarter集資緊，$3,499美元可以買到個，撇除非法改裝問題，其實好啱香港人。