傳家之寶 G2 P51 Combat Fighter

文：MenClub 魏文青　　
POSTED ON 23 Aug 2015

講起傳家之寶，正路啲大家可能會臨起珠寶玉器、首飾古玩；變態啲可能會諗到AV硬碟、J圖資料庫，但好少人會諗住傳架車比個仔。當然第一個可能係你根本冇車，就當你有，正如姜大衛話齋「再鋒利嘅刀都有生鏽嘅一日」，唔好話傳兩代人，架車唔揸兩年都未必再撻得著，要做傳家之寶真係有啲難度－－除非係呢架G2 P51 Combat fighter！

呢架由Confederate打造嘅電單車，以「反抗」為主題。根據官網介紹，所謂「反抗」即係「Say No」，向貧窮Say No，向貪污Say No，向權力Say No。而最根本、最血性嘅反抗力量就係你嘅一雙鐵拳。直接啲黎講就即係呢架P51 Combat Fighter代表嘅係純粹嘅力量！

純到咩地步？就係純到成架車，由車架到整個動力系統(引擎、波箱等等等等)全部用上6061鋁合金打造。呢個「CX4」系統由Confederate創辦人H. Matthew Chambers，以及製造出全球直線加速最快兩輪車，Kosman Racing嘅創辦人Sandy Kosman，花十八個月時間合力研發，以CNC(數控機床)直接由6061鋁合金塊加工出前前後後175個車架零件。咁樣做有兩個好處。第一，可以承受巨大加速力。事實上P51嘅V-Twin引擎出力超過200匹，以電單車黎講絕對係怪物級數。個車架唔夠實淨都頂唔順。

第二個好處就係夠哂「襟擺」，頂得住歲月催殘。就算當家傳之寶一路傳落去，只要啤鈴、車胎同制動系統運作良好，架車就同新嘅一樣。官方仲話就算傳到「孫個孫」嗰輩，揸落去個手感都係唔會變！難怪揹得起113900美金(約88萬HKD)嘅價錢啦！不過呢個價錢，我諗都要有人傳畀我，我先有機會傳到畀人啦……