如果話呢個世界上有一個人，佢唔做嘢係正常、做嘢先算係新聞的話，咁呢個人好可能就係《Hunter X Hunter》嘅創作者，人稱「富奸」嘅「冨樫義博」——而咁多位，我哋有新聞啦！「富奸」事隔足足8個月終於又開始工作啦！

話說「富奸」日前突發近日個人X，上傳咗一張影住大約十令頁原稿一角嘅照片，再留言指「No.413 背景指定完了。」顯示佢近日已經重投《Hunter X Hunter》嘅創作。「富奸」於去年12月21日發文指自己完成單行本嘅修正之後，就再無任何動靜。換言之今次係佢事隔8個月首次公佈新嘅工作進度。

《Hunter X Hunter》目前嘅「最新」一話，就係去年12月中連載嘅第410話。考慮到自從《Hunter X Hunter》進入不定期更新之後，「富奸」每次都係更新十話就再次休息，可以估計佢目前畫緊嘅應該係第411至420話。而收錄401至410話嘅單行本第39期，就應該會於連載再開時發售。

目前最新一集單行本第38話《結成》封面

上次創作401至410話時，「富奸」係於2024年5月1日開始更新工作進度，正式連載就由10月初開始，換言之佢畫10話大約要5個月時間。以此推斷，今次更新應該要到下年1月先會開始連載。

不過相信一眾Fans都唔會太過心急。一來等咗咁多年大家都慣啦，二來係上次連載進入尾聲時，「富奸」於X上表示自己因為長年嘅腰痛問題而去做咗次手術，部份工作更係於手術後休養期間完成，唔少Fans都體諒佢嘅難處，勸佢要以身體為重。希望「富奸」目前身體已經有所好轉，可以順利今次連載啦。