喺香港，嗰啲乜都鍾意投訴、郁啲就話要「見經理」嘅人，我哋通常稱之為「西客」；而於歐美，因為有類似行為嘅都係白人中年婦女，所以網民就叫佢哋做「Karen」。如果你都仲係唔明「Karen」究竟係啲點樣嘅人的話，咁Steam上嘅新遊戲《Karen》就非常值得你留意，事關玩家於呢個「西客模擬器」中，就係要扮演一個「Karen」大鬧商場及店鋪！

《Karen》係由獨立遊戲開發商Sauce Studio製作嘅第三身動作遊戲，玩家扮演一個擁有標誌性短髮、戴住粗框眼鏡、身穿運動休閒裝嘅中年白人女性「Karen」，任務係喺一個高檔購物中心裡面儘情做「西客」，用盡一切方法令到所有人都不得安寧。遊戲整體充滿極致嘅諷刺意味，Steam上嘅宣傳片第一秒就已經惡搞遊戲評級，指遊戲評級為「E」即「適合特權人士（Entitled）」。隨後就見到「Karen」憤怒登埸，破壞商場內由桌椅到貨架乃至牆壁等嘅一切——都真係要讚下遊戲嘅物理引擎以及打擊感睇落非常唔錯。

據Steam上嘅介紹指，遊戲以一個星期為主線，每日都會有一份「西客任務清單」，包括「要求退款」、「食晒試食品」、同埋「市民逮捕」（普通公民於特定情況下將犯罪嫌疑人逮捕的權限，但經常被Karen們濫用）。完成每日任務之後，玩家仲要面對一場Boss戰，對手係商場員工，例如商埸保安員，或者店員等。隨住遊戲進行，商場員工會逐漸識破你嘅把戲並且反擊，而Karen嘅應對方法只得一個——繼續升級發爛渣，整出更大嘅場面。

《Karen》上星期於Steam上首次公佈，隨即就吸引到外國網民注意，而隨住相關報導出現、以及Asmongold等著名直播主都有討論，遊戲嘅熱度亦節節上升。可惜嘅係遊戲目前未有確實發售時間，Steam上只顯示「Coming Soon」。如果遊戲能食住呢個熱度推出，或者有望成為今年嘅獨立遊戲神作之一？

資料來源：Polygon