項某近年股場得心應手，除左做trade小心甚少輸掉信心外，最重要的一點是「保持清醒，免受蒙蔽」。市場上太多散戶長期輸多贏少主要是因為他們太天真。很多人往往以為「股市」是「不勞而獲」的捷徑。間唔中見到有股票單日升10%，買幾萬就賺幾千，「嘩真係好過返工」的心態令他們以為股票市場是單純的遊樂場。當你在市場可以「出入自如」，有能力洞悉市場轉變作出部署時，股票市場的確是一個遊樂場。否則的話，充滿大鱷的市場是貨真價實的「鱷魚潭」，你亂闖就只有「凶多吉少」。

最重要是如果你連市場運作和技倆都唔清楚的話，你又如何在市場上贏錢呢?

隔離屋個C奶成日向項某呻買股票輸錢「明明跟足哂「大師」指引嫁啦，點解呢兩隻升兩日又跌過?」她們口中的「大師」來頭可不小，甚麼首席分析師、研究部主管，一聽就知「高級」，加上個個西裝骨骨、靚仔有型，師奶當然「dap」哂糖。

有一次在電梯口C奶撞到我即刻問：「今朝靳星星話隻9413前景好喎，你點睇丫?」

「呢隻我尋晚都睇左陣，應該唔得喎」

C奶即刻為油頭粉面的專家出頭：「人地靳SIR個樣咁醒神，人地D分析你識條春咩，你得閒唔好成日去踢波，去讀多幾年書啦」

項某唯有cut佢線：「咁你贏多D!」

兩個星期後，係超市撞番C奶，我正想扮睇佢唔到閃左去之際，突然一隻充滿魚腥味的手輕搭我膊頭，項某心諗：「SHxT!」

「喂，靚仔，隻9413跌左兩成，你話止唔止蝕好」

「你打去問Dr. 靳，等佢答你好D」

「唔好提佢啦，佢呃得我好慘啦」

「呢D野你情我願既，係人都會分析錯既，你自己跟無得怨人」

「佢上次隻796同169都唔得呀，以為佢係投行的首席分析師一定掂啦，點知咁無陰公」

項某唯有忍唔住贈佢兩句：「你咁天真不要買股票了，輸死你丫。如果佢真係咁掂咁緊要，就留在公司做大事照顧大客仔啦，點會日日上媒體免費俾『貼士』你丫? 你估你真係「童顏C奶」丫?」

股場如戰場 僅適者生存

項某先不論股壇明星存在的意義和作用，只希望大家上戰場前先要放下林林種種的天真。雖然最尾那句我估個C奶都唔會明，不過起碼我相信C奶內心應該會少了兩分的天真，多了一分的勝算。