Tesla股價今年屢創新高，累升超過6倍，成為表現最好嘅股票之一，亦令Elon Musk嘅身家暴漲至1270億美金，超越Bill Gates成為世界第三大富豪 (前兩位係Amazon嘅Jeff Bezos及LVMH嘅Bernard Arnault家族)，睇落就好似一帆風順。但據《CNN》報導，Elon Musk日前於一封公司內部電郵中警告員工，Tesla嘅股價可能會如「大槌下的梳乎厘」一樣暴跌。

據《CNN》報導，Elon Musk於電郵中指，Tesla目前嘅毛利率其實只有大約1%，而股價之所以暴升，唔係反映緊公司目前嘅盈利能力，而係投資者對於未來盈利能力嘅期望，「如果有一日，佢哋覺得 (預計中嘅利潤) 唔會出現，我哋嘅股價就會如大槌下的梳乎厘崩塌。」

而Elon Musk之所以要Send呢個電郵出黎，就係希望員工能夠搵到一切能夠減省成本嘅方法。「呢個係個好難玩嘅散銀遊戲 (Game of Pennies)，我哋要有上千個好方法，可能係一個工廠嘅工序或者就咁一個新設計，去改善我哋嘅成本。一個好好嘅方法可能慳到5蚊美金，但絕大多數方法都只會係呢到慳幾毫、嗰到慳幾毫。」

圖片：Wikipedia

Elon Musk星期二亦於一個訪問中直言「Tesla嘅股價太高」。Tesla目前嘅公司估值係德國汽車生產商Volkswagen嘅5倍有多，而Volkswagen係全球最大銷售量汽車製造商。