因《Netflix》紀錄片《Tiger King》而家喻戶曉嘅Joe Exotic向美國司法部提告，指司法部刻意扣起佢份特赦申請唔畀特朗普總統見到。

卻說坊間認為特朗普總統會於本屆任期屆滿前行使美國憲法授予嘅特赦權 (過去多屆總統都有同樣慣例)，而又因為特朗普總統個仔Donald Trump Jr.曾經公開表示「有可能支持特赦Joe Exotic」——雖然佢當時並非認真講，而且亦講明「唔覺得Joe Exotic完全無辜」，只係「但如果你話我哋會呢個人佳三十年監，我又覺得好似過份咗少少」——所以Joe Exotic9月時就已經開始要求美國司法部向特朗普提出特赦。

圖片：截圖自美國司法部網站

而之所以佢依家會告司法部呢，就係因為佢覺得司法部根本就冇將佢份申請遞到去特朗普總統面前。「Joe Exotic要求美國司法部特赦檢控官辦公室完成佢嘅部門職責，將Joe Exotic嘅特赦申請提交至特朗普總統而前，令總統先生能夠行使佢嘅憲制權力，決定是否特赦Joe Exotic」。文件中亦指於美國司法部嘅網頁中搵唔到Joe Exotic嘅特赦申請，「好似我冇交過上去咁。」不過據《Deadline》查證，司法部網站係可以搵到Joe Exotic特赦申請紀錄。

Joe Exotic於2019年被判17項虐待動物及兩項密謀殺人罪，需監禁22年。