過去呢兩年疫情，唔少公司都試過實施Work From Home，甚至有唔少國際企業決定即使疫情過去，都會繼續容許至少一部份員工繼續WFH，不過呢啲「國際企業」就唔包括Apple。Apple CEO Tim Cook於今月初向所有員工出信，要求員工由九月起每個星期至少返三日，就算員工聯署反對都堅持。

Tim Cook於六月頭嘅電郵中話，雖然過去一年WFH佢哋都造出好成績、雖然視象會議等科技能夠縮短人與人之間嘅距離，但「面對面嘅接觸依然係無可取替」，所以要求員工由今年9月起回復正常上班，其中星期一、二、四係必須回到辦公地點，星期三、五員工就可以「選擇」WFH。另外每位員工每年亦可以申請兩個星期完全唔返公司，不過就要上司批准。據報於新規定下，只有極少數員工能夠維持完全遙距工作。

比起Google於五月宣佈有20%員能夠完全永久WFH，以至Facebook創辦人Mark Zuckerberg高呼「WFH是未來」，承諾只要上司批准，所有員工都可以永久WFH，Apple嘅新措施的確非常保守。80名Apple員工於六月初向Tim Cook發出聯署信，表示「缺乏靈活性帶來的包容性，我哋覺得被迫要於家庭、健康、把工作做到最好，以及成為Apple一部分之間作出取捨。

結果，Apple 零售及員工副主席Deirdre O'Brian昨日再次重申，「我們相信面對面合作係我哋嘅文化與未來」，簡單啲黎講就即係拒絕Apple員工嘅要求。要注意嘅係，喺疫情之前，Apple係出咗名唔鼓勵員工WFH，依家似乎就係回復過去嘅做法。