日本京都作為歷史悠久嘅「千年古都」，除咗承載日本歷史文化以外，亦係大多數人去日本旅行嘅必然選擇之一。但據京都市市長門川大作於6月時表示，京都正面臨極大財務危機，市政府債台高築而且已經冇現金可用，目前只能借新債還舊債，如果情況繼續落去，十年內京都市政府就有可能破產。

據《讀賣電視新聞》近來做嘅專題分析，京都市會陷入財務困境嘅原因主要有   個。第一係因為早年投資嘅基建從未回本，例如泡沫經濟時期建造嘅地鐵東西線，由營運至今乘客量從未達標，於是要市政府由2004年至2017年間共借出1000億日元填氹，但依然都係冇錢賺，亦即市政府嗰1000億係掉咗落鹹水海。

另一方面，市政府本身嘅收入亦非常唔健康。日本市政府主要收入來源為住民稅及不動產稅，問題係京都市人口有近一成都係大學生，每年又至少有1000名「三十代」成年人搬離京都，導致符合住民稅條件嘅居民比例只有43%，為全日本最低；不動產稅又因為市內有大量免稅嘅歷史建築、為咗維持市貌而限制高樓大廈嘅建造、以及居民搬離後單位被外國 (主要係中國) 買家買下成為別墅長期空置而被壓縮。

收入被壓縮，但支出方面就無減少。京都市一直維持高福利政策，例如提供為為長者而設嘅「敬老巴士」、育幼院中嘅保育士比例亦比法例規定要高。種種福利都令市政府支出居高不下。

值得一提嘅係，立命館大學的森裕之教授話，雖然疫情令京都旅客大幅減少，的確影響市政府收入，但就算即刻就有大量旅客湧入京都，都唔會解決到市政府嘅燃眉之急。佢話旅客們嘅花費大多會落入企業之手，但企業賺到錢係唔會立即向員工加薪，就算加都唔會係按賺錢比例咁加，亦代表根據薪酬而收嘅住民稅唔會有太大長進。所以目前京都最需要嘅係大幅財政改革，否則好快就會步北海道夕張市後塵破產。

資料來源：読売テレビニュース