相信唔少男士都幻想過，有朝一日可以遠離繁囂，喺外國揸住部露營車到處旅行，欣賞各地自然風光。最近歐洲公司Dembell就以Mercedes-Benz三軸拖頭為原型，改造出超豪華露營車，車內唔單只配備木地板、名貴傢俬、廁所廚房等起居設施，仲有一個巨型車庫，最大可以容納4.5米長嘅汽車，堪稱行於陸上嘅超級遊艇。

車箱內部由著名遊艇品牌Azimut設計，駕駛艙設有4張舒適按摩座椅，起居室就有一張皮革梳化、全套Miele電器嘅開放式廚房、石材浴室加陶瓷馬桶、一張大雙人床，而且臥室同起居室都有一部配備Bose家庭影院系統嘅大電視。

除咗奢華嘅裝潢同傢具外，車頂亦裝有太陽能板、配備車載發電機、冷暖氣，1,000公升水箱等等，甚至有一個電動遮陽傘可以畀車主喺汽車旁邊用餐。

（圖片截自：dembell）

另外，呢部車最大嘅賣點就係具備車庫功能，官方共提供三尺寸選擇，最細嘅大約放得入幾部單車或電單車，而中型及大型尺寸就可以放得入一部車長唔超過4.5米嘅汽車，加埋一齊就彷如一座移屋城堡，售價及開賣日期就有待官方容後公布。

（圖片截自：dembell）