近年加密貨幣再度備受關注，除咗獲得首富Elon Musk多次公開支持，如今連Apple行政總裁Tim Cook都話出於個人興趣而持有加密貨幣，同時透露Apple亦研究緊相關技術，但就強調唔會用公司資金去投資加密貨幣，短期內Apple產品亦唔會支援透過加密貨幣支付。

據外媒CNBC報導，近日Tim Cook於《紐約時報》DealBook會議被問到是否擁有比特幣（BTC）或以太幣（ETH）時，佢承認自己確實留意咗加密貨幣一段時間，亦因為出於分散投資角度而持有加密貨幣，不過就唔會分享啲咩投資建議畀大家，又強調目前Apple雖然研究緊加密貨幣技術，但短期內並冇任何計劃。

另外，Tim Cook又強調唔會動用公司資金去投資加密貨幣，因為佢覺得投資者買入Apple股票並唔係為咗接觸加密貨幣。至於外界所傳嘅「Apple將會支持加密貨幣作為支持方式」，佢就話公司短期內並冇打算咁做。