唔少人細個嗰陣，都有煩惱過大學應該讀咩科，大致上都係於「興趣」及「收入」之間作出取捨，而依家嘅你又有冇為當時嘅選擇而後悔？根據美國一個求職網站做嘅研究，原來有44%大學畢業生都會後悔當初「揀錯科」，而災情最嚴重嘅就係一眾人文學系，其中後悔讀新聞嘅人更有近九成，原因好簡單，就係因為錢！

據美國求職網站ZipRecruiter出月初公佈嘅調查，有44%嘅大學畢業生都會認為自己當初揀錯科，其中一眾人文學科畢業嘅「後悔率」都奇高。例如後悔讀新聞嘅人高達87%，後悔讀社會學及通識嘅有72%，後悔讀傳理嘅有64%，後悔讀政治嘅有56%。事實上頭十最令人後悔嘅大學主修當中，有六個都係人文學科，其餘四科則為教育 (61%)、市場營銷及研究 (60%)、醫護助理 (58%)、及生物 (52%)。

而另一邊廂，最唔會後悔嘅大學主修就係電腦與資訊科學 (72%)，其次為犯罪學 (72%)、工程 (71%)、護理 (69%)、健康(67%)、商業管理 (66%)、金融 (66%)、心理學 (65%)、土木工程（65%）、人力資源管理（58%）。

咁後悔同唔後悔嘅主因係咩呢？答案就係好現實嘅「錢」。例如以最唔後悔嘅電腦與資訊科學，由於各個行業都要求相關人材，所以畢業生嘅人工非常高，平均年薪可以達10萬美金，即月薪約6.5萬港紙；而即使係讀傳理、市場營銷及研究等「最後悔學科」中，收入較高者亦更傾向唔後悔當初嘅選科，例如表示唔後悔讀傳理嘅人，平均收入比起後悔嘅人高1.6倍；而唔後悔揀市場營銷及研究嘅人，收入更被後悔嘅人高3倍。

資料來源：ZipRecruiter