唔少人都會認為，有錢人之所以有錢 (唔計啲富二、富三代啦下)，係因為佢哋聰明、佢哋能力高，但根據瑞典嘅一個研究發現，雖然一個人嘅認知能力與收入的確係大致上呈正比，但越有錢，個關係就越唔明顯，研究甚至發現，收入最高嘅一群，認知能力其實係比收入冇咁高嘅更低。換言之，有能力都唔代表你搵到錢。

圖片：CBC

是次研究由瑞典Linkoping大學、意大利European大學以及荷蘭Amsterdam大學共同進行。其主要內容係分析咗近六萬名瑞典男性於18-19歲為當兵而進行嘅認知能力測試，再對照佢哋目前嘅年收入，以得出認知能力與收入之間嘅關係。研究團隊指出，雖然認知能力越高，收入的確係會越高，但去到年收入60,000歐元以上嘅組別，認知能力與收入之間嘅關係就已經非常唔明顯。如果淨係睇收入最高嘅1%人，其認知能力甚至係比收較低嘅人更低。

換言之，縱然認知能力越高的確能帶來更高收入，但單靠認知能力帶來嘅收入其實有限 (以呢個研究而言，就係大約年薪60,000歐元)，而要再進一步，好可能係睇個人嘅社會經濟背景、當地文化、個人特質以至單純嘅運氣。而且呢啲細小嘅不同，會隨住收入上升而變得越黎越重要，最後造成「贏家全取」嘅局面，亦係點解目前世界各地貧富懸殊問題嚴重嘅原因。

研究團隊於結論表示，佢哋唔認為有任何證據顯示，超高收入嘅一群人，係比嗰啲只搵一半錢嘅人，更「值得」搵到咁多錢。

資料來源：The plateauing of cognitive ability among top earners