人類總要重複同樣的錯誤，類似「HJ2Q」事件久唔久就會發生一次，阿寶想抖下都唔得。不過，將來覆水都可能有得收，WhatsApp準備加入新功能，Send錯Message都有得刪除，但係前提係你要夠手快，因為只可以刪除7分鐘內Send出嘅訊息。

家陣WhatsApp嘅刪除訊息功能只能夠單方面喺自己度刪除訊息，對方一樣會睇到個Message。早前WhatsApp就測試加強版嘅刪除訊息功能，家陣更加喺FAQ常見問題頁面「刪除訊息」一項度，直頭註明加入新功能，可以選擇完全刪除一個或多個訊息，等對方方睇唔到個訊息。方法係點選想刪除嘅訊息後，再揀選垃圾桶icon，就會見到「Delete for everyone」（向所有人刪除）嘅選項；確認後，對方就唔會再睇到該訊息，而只會見到「This message was deleted」（此訊息已刪除）。

不過，呢個刪除大法係有兩個限制嘅。第一係時限，只可以刪除7分鐘內發出嘅訊息；7分鐘一過，你唯有講句「Sorry Send錯」啦。第二個條件就係收發雙方都要使用最新版本嘅WhatsApp，否則有機會刪除唔到。暫時WhatsApp未有公布新刪除功能確實推出日期，但連FAQ都出埋街，相信指日可待。

來源：WhatsApp