最近Bitcoin氣勢如虹，升破10,000美元，人人蜂擁去「開礦」挖Bitcoin，做礦工好過返工啦。只不過，採礦最貴嘅成本唔係部礦機，而係電費，因為重複運算對電力消耗量非常高。於是大家就各出奇謀慳電費，有人仲諗到個偏門免費電力供應：Supercharger充電站。

據外國網媒報道，喺Tesla Owners Worldwide Facebook群組有人腦洞大開，諗到可以改裝部Tesla加接礦機，再拎去Supercharger度，享用平價甚至免費電，慳返一大筆成本，仲可以流動工作唔使屈喺工廠添。點知有車主認真實行，真係改裝部Tesla，喺尾廂加設四組礦機，仲放埋相上群組。假設呢組設定係可行，估計需要3kW電；以香港Tesla收費計，每年首400kWh電為免費，其後每kWh收費$2.3；如果係2017年1月15日前落訂嘅車主就直頭免費充電，He Fat Fat La。

不過，呢位車主嘅做法就引來質疑，Supercharger嘅電如果用喺充車以外嘅其他用途，係咪屬於「偷」呢？目前Tesla條款上未有明文規定Supercharger電力只能用於充車，但有列明會收集車主「充電速率及充電座（包括其所在位置）的相關資訊，以便分析哪些充電站得到利用、電池充電所需時間長短及效率」，都有機會知道車主充電狀況異常。呼籲大家一句，就算免費都切勿亂用啦。

來源：ecomotoringnews.com