Elon Musk試飛火箭　載Tesla Roadster上太空？

文：MenClub 路兒　　圖：互聯網
POSTED ON 04 Dec 2017

Tesla總裁Elon Musk出名係個離晒地嘅大夢想家，除咗電動車，仲醉心發展航天科技。最近佢就喺Twitter度預告，SpaceX下個月會試飛Falcon Heavy火箭，載啲咩上太空？就係Tesla新車—Tesla Roadster咁話。
Falcon Heavy to launch next month from Apollo 11 pad at the Cape. Will have double thrust of next largest rocket. Guaranteed to be exciting, one way or another. — Elon Musk (@elonmusk) 2017年12月2日
Payload will be my midnight cherry Tesla Roadster playing Space Oddity. Destination is Mars orbit. Will be in deep space for a billion years or so if it doesn’t blow up on ascent. — Elon Musk (@elonmusk) 2017年12月2日
Elon Musk喺Twitter度話，下一個月試飛火箭Falcon Heavy時，會負載「櫻桃紅色嘅Tesla Roadster，一路播住Space Oddity上火星軌道，唔爆炸的話分分鐘會留喺太空成千上萬年。」消息一出，唔少人都好緊張，想知道消息係咪真確有冇吹水。Falcon Heavy可負載54噸（119,000磅）重量，一架Tesla Roadster重約833kg，即1,840磅，唔好話一架，放幾十架理論上都仲得。加上之前SpaceX試飛試過爆炸，載人前先載車都不足為奇。

傳媒向Elon Musk求證消息，Elon Musk都好鬼馬，起初就電郵回覆話消息屬實，轉頭又透過Twitter私訊話「全屬捏造」，自己吹出嚟。當大家以為佢咁有幽默感又講笑，Elon Musk又向另一間傳媒確認消息屬實；SpaceX官方亦走出嚟向傳媒證實，的確有計劃試射火箭時負載Tesla Roadster。一時一樣，估唔到Elon Musk都識玩炒作喎！來源：The Verge, Ars Technica