冇陰功　畀錢買NoPhone

文：MenClub Patrick　　圖：互聯網
POSTED ON 03 Oct 2014

眾所周知，Kickstarter上面乜鬼千奇百趣嘅嘢都有，只要發起人夠膽放上去sell，即使擺明係冇用嘅嘢都得。目前就有一部名為「NoPhone」嘅貨物喺Kickstarter度集緊資，實情只係一件爛gag貨品，但都吸引四百幾人科水，籌到八千幾蚊美金，純粹賣創意都賺到錢！

所謂「NoPhone」，真係只係一嚿乜功能都冇嘅硬膠，但最搞鬼係發起人竟然諗到拎佢同iPhone 6比較，係有防水、防碎同真正「Face Time」（真人面對面傾偈）呢3個iPhone 6冇嘅優點，而且仲可以黐塊鏡上去「影」真實Selfie，簡直係9gag級數嘅gag。你可能覺得佢好無聊，但真係有成班人話想買，最多嗰個仲畀咗成百幾蚊美金。「NoPhone」嘅集資仲有8日就到期，雖然發起人本來定出三萬美金嘅目標「叫價太高」，睇怕一定達成唔到，但其實執到現有嘅八千幾蚊美金都好禾味啦！呢個故事啟發到大家，只要度到條好橋，就可能值得呢個價㗎喇。