各位iPhone嘅用戶，有冇試過開完飛行模式再轉返正常模式後，一直都係顯示冇服務呢？原來問題唔係出喺網絡度，而係喺手機之上。Apple確認iPhone 7組件有故障，香港亦有部分型號不幸中招，但唔使驚，官方將會免費向合資格嘅問題手機提供維修服務，睇睇自己是咪不幸嘅兒童？

Apple於官方網站上發出公告，指即使有網絡覆蓋，有少部分的 iPhone 7 裝置仍然可能會在狀態列上顯示「沒有服務」，原因係「主機板上某個組件故障」。據指問題多數出現喺用戶啟用飛行模式後，即使已經關閉飛行模式，iPhone 7仍然會顯示為「沒有服務」；Apple曾建議用戶拎張SIM卡出嚟再重新插入。

Apple確認出現問題嘅iPhone 7於2016年9月至2018年2月間出廠，並且於香港、中國大陸、澳門、日本同美國出售；其中香港出售嘅型號為「A1660」。如果閣下發現自己部iPhone 7都有同樣問題，又或者屬上述不幸嘅型號範圍，都唔使擔心，拎去Apple Store或Apple 授權維修中心就可以免費維修架啦，詳情可瀏覽官網公布。之前因呢個問題而畀錢整過機嘅用戶，Apple都將於2018年3月底前透過電郵聯絡補償事宜。