日前Fujifilm喺德國科隆舉行嘅發布會中，推出咗中片幅無反相機GFX-50R，同時亦公布咗全球首部1億像素嘅中片幅無反新相機GFX-100，呢部GFX-100除咗像素有睇頭外，連價錢都相當有睇頭。

正當Canon、Nikon及Sony三大廠都集中搶佔全片幅無反相機市場時，Fujifilm嘗試「入佢中路」發展中片幅無反相機市場，即將喺明年上市嘅GFX-100係世界首款達到1億像素嘅中片幅無反相機，而售價為US$10000，折合約為HK$78,140，屬最平價中片幅相機。GFX-100除咗具備防震機能，仲支援最高4K錄影。

相信唔少人都會問點解中片幅像素咁高，仲會高過全片幅。其實數碼相機嘅感光元件就等於菲林拍攝嘅菲林，而「片幅」就係菲林嘅尺寸大小，仲分為小片幅、中片幅及大片幅三大類。而當中大家平時叫開嘅全片幅(Full Frame)就屬於小片幅，一般指135mm菲林；而中片幅則指120mm菲林，比例有6x4.5、6x6、6x7等。所謂「一寸長一寸強」，中片幅相機有更大嘅感光元件，每個實際拍攝嘅像素尺寸就會更大，而可以紀錄嘅光就會越多，簡單啲講啫係靚啲。

來源：Engadget