- SITE MAP
- |
- CONTACT US
- |
- ADVERTISING
- |
- PRIVACY
- |
- MOBILE
- |
- RSS
| 雖然而家又凍又乾，但睇怕春天唔使幾耐就會嚟，到時周圍又變到濕立立，幾難頂。呢種天氣，除咗最驚啲衫晒唔乾有陣霉味外，鞋履因唔夠乾爽，焗住啲汗焗到有臭味，亦都好令Gentleman頭痛。 大佬，喺屋企除鞋有味俾老婆或女友哦都事小，去到人哋屋企遇到咁嘅情況先尷尬呀。更大鑊嘅係，要去啲高檔少少嘅日本餐廳食飯應酬嗰陣要除鞋的話，真係唔知點算好，唔通中間偷走搵個地方洗腳換襪再噴番香對鞋咩！ 唔想咁樣，可以點樣？其實都有橋減少遇到呢啲尷尬境況嘅，梗唔係叫大家放幾大包防潮珠入鞋籠咁戇dog dog啦，係可以試吓用呢部AKAI XSS-700鞋履殺菌除臭機。Work唔work？我班咗部返嚟試畀大家睇！ | |
| |
| 紫外線殺菌 光觸媒除臭 其實靠咩能夠幫對鞋又殺菌又除臭？就係UV紫外線！喺呢部機兩隻插入鞋籠嘅伸縮臂尖端入面，都內置咗UV燈，即係古天樂成日晒嗰啲燈呀，原來唔止可令人變黑，仲可以殺菌消毒㗎！官方話XSS-700所用嘅技術，經過日本食品分析中心證實，能有效殺死足癬菌同金黃葡萄球菌，消毒率更加高達99%！ 老老實實，我唔知點解係搵食品分析中心驗畀鞋用嘅殺菌機，亦冇能力驗證係咪真係殺到咁多菌，我只能夠試吓經佢殺完菌嘅鞋，係咪真係冇味。不過，試之前仲要講解埋佢另一種除臭技術，就係光觸媒。 呢樣嘢大家應該接觸得多啲，事關現時好多雪櫃都有用佢嚟僻味。光觸媒只要一經光線照射，就會釋放出二氧化鈦電子，呢啲電子能夠分解有機物入面嘅氣味分子，達到除臭效果。 | |
| |
| 烘乾鞋防「吽菌」 另外，鞋履殺菌除臭機其實仲有第三個功能，就係靠燈光嘅45度熱力去烘乾對鞋。但咁做唔係為咗等大家洗完鞋快啲乾，而係想盡快蒸發腳汗嘅濕氣，唔濕就自然唔會「吽菌」，咁就預防到唔會產生臭味啦！ | |
| |
| 長boot都用得 好喇，正式試吓部機。佢兩隻插鞋嘅臂可以伸縮同調校角度，唔只男士嘅皮鞋、波鞋同短身boot用得，女伴嘅長boot亦可以用。用法好簡單，只要插對鞋落伸縮臂，㩒着開關掣，再揀埋要消毒幾耐，跟住就乜都唔使理，消毒完佢就會自動熄機。 | |
| |
| 最快15分鐘冇晒味 時間掣有得揀15、30同60分鐘，齋烘乾鞋嘅話，15分鐘夠有突；一般消毒揀15或30分鐘都得；自覺對鞋勁多菌、臭到冇朋友，就最好殺足60分鐘，香港腳患者最應該用呢種「深度處理」。 呢排天氣又凍又乾，我嘅腳汗唔多，所以用嚟試嗰對boot，雖然已經着咗成日，但都唔算大味，只係近距離聞先覺有少少臭，插落部機消毒咗15分鐘，等鞋籠完全乾透之後，再聞已經完全唔覺有味。但當然，部機唔識令啲鞋變香，所以唔會好似李+X咁講：心曠神怡。初步測試，覺得部機係work嘅，但要等到遲吓春夏天嚟到，或者搵對勁臭嘅鞋嚟試，先會見到真章。 | |
實試
| |
| 售價：$1,490 查詢：Signeo Design 3403 2864 | |