2020年可能係一眾機迷充滿期待嘅一年，因為Sony及Microsoft都已經宣佈，將會於今年分別推出各自嘅家用遊戲機主機，其中Sony將會推出PS5，而Microsoft就會推出Xbox Series X。除左以上兩款家用主機之外，有傳任天堂今年亦將會推出手提遊戲機Switch嘅升級版Switch Pro。

據台灣供應商消息指，一款全新嘅Switch手提遊戲機將於今年第一季進行量產，並預計於今年年中出售。而外界估計，今次傳聞會進行量產嘅Switch就係此前一直盛傳會推出嘅Switch升級版 - Switch Pro。

其實早於去年嘅時候，已經推出Switch一段時間嘅任天堂宣佈將會推出兩款後繼機，但最終只係推出左價錢較平嘅Switch Lite，而另一部相信就係傳聞中將會投入量產嘅Switch Pro。

分析師認為今次Switch Pro將全面升級，例如將會支援4K、遊戲卡容量更大以及其他組件升級等等。要知道Switch嘅銷量行情相當出色，截至去年9月已經售出接近4000萬部，如果計埋Lite的話則達到4167萬部。

當然如果今次任天堂唔能夠提升Switch嘅效能以吸引買家，咁樣2020年任天堂可能會被Sony及Microsoft大大比下去，因為預計PS5及Xbox Series X嘅效能將會前所未有，雖然對於玩手提遊戲嘅玩家要求可能無家用機咁高，但始終對比過大的話將會帶來負評及唔好嘅印象，所以相信任天堂將盡可能收窄與家用機嘅差距。