黎到21世紀，大家可能會覺得人類對於「人類」呢個物種嘅身體構造非常理解，即係至少我哋都知道人身體入面有幾多個器官係咪？你錯啦，因為根據《CNN》報導，一班荷蘭研究人員最近竟然無意地發現人體中嘅一個「新器官」。

截圖自：https://www.youtube.com/watch?v=RHAyoQF09X4&feature=emb_logo

話佢「新」就唔係話人類突然生多咗舊嘢出黎，而係話呢舊嘢之前一直冇被發現、或者被忽略，所以並無紀錄落黎。卻說荷蘭有一班本來研究緊前列腺腫瘤嘅研究員，利用新型掃瞄「PSMA PET/CT」試圖搵出腫瘤擴散程度時，無意發現參加者嘅頭骨中、鼻腔與喉嚨交接處有一對不知名腺體，翻查100名參加者嘅掃瞄及解剖紀錄後，確認該腺體實際存在。

目前研究員估計，該器官應該係唾液腺體嘅其中一部份，但又與目前有紀錄嘅唾液腺體唔一樣，所以有可能係全新發現嘅「器官」。但醫學界當唔當呢抽嘢係「器官」就好有可能要爭論一排。事關醫學上嘅「器官」定義，係指該人體組織有有別於其他器官嘅特定功能，如果唔係就應該被歸於另一個器官之中 (即係眼係一個器官，喺眼入面發現新組織佢都係眼嘅一部份，但你多咗條接受腦電波嘅天線就係新嘅器官)。

而撇除係咪器官嘅名義之爭，是次發現最重要嘅影響，係當以電療處理頭部或頸部癌症時，或者有必要避開該組織/器官，以避免影響患者分泌唾液嘅能力。