最近有一班「加密藝術家」（Crypto Artists）買咗街頭藝術家Banksy作品《Morons》並將其燒毀，轉化成NFT（Non-Fungible Token）拍賣，令投資者可以用加密貨幣喺網上競標。

所謂嘅NFT（Non-Fungible Token）係一種新型數位資產，其擁有權將會記錄喺區塊鏈（BlockChain）上。雖然技術上同加密貨幣相似，但Bitcoin每個幣都係等價而相同，而NFT就每一個都係獨一無異，無法取代及拆分。正因為呢個特質，令NFT可以成為證明數位藝術品擁有權，提供新嘅「驗證」方法。

如果數位作品唔似現實名畫咁有「身份證明」，非常容易變得一文不值。

由於現時數位藝術品可以輕易被無限複製，例如創作者畫咗幅素描畫上傳到社交平台，又無落水印嘅話，經網友多次複製及轉載後，好快就無法考究作品出處及原作者，同時亦無法區分真品定係複製品。而NFT嘅出現，就可以令數位資產變得同現實名畫一樣有「身份證明」。

唔講你又知唔知經典meme圖「Nyan Cat」作者係邊個？

根據Forbes報導，喺過去一個月入面，NFT市場創造超過3.5億美金銷售額，專門從事數位肖像買賣平台「Hashmasks」更成為第三大受歡迎NFT交易平台。早排，著名Meme「Nyan Cat」創作者Chris Torres亦將「Nyan Cat」GIF圖翻新，放上NFT交易平台拍賣，最終以300以太幣（Ethereum）賣出，折約468,300美金（約363萬港幣）。

一班加密藝術家燒毀Banksy作品以引大家關注NFT。（圖片截至：Youtube）

回歸正題，班「加密藝術家」買Banksy幅畫嚟燒，正正係為咗證明新時代即將來臨，燒嘅只係物理上嘅作品，然而該作品已轉化為NFT成為數位資產，能夠喺網絡上進行自由買賣。

資料來源：coindesk、Forbes、世界新聞網