近年AI已經由科幻小說中嘅設定，成為大家日常生活中嘅一部份，而有唔少人亦擔心憑AI幾乎無限嘅「智力」，AI可能會如科幻小說情節一樣取代人類——如果你都有呢個擔心，咁以下呢單新聞就應該令你「放心」唔少，因為原來人工智能比起大家想像中都要蠢，至少目前係。

圖片：OpenAI

Tesla創辦人Elon Musk有份創立嘅AI研究所OpenAI嘅研究員最近發表咗一篇貼文，主要係講解佢哋開發中嘅一款透過機器學習 (Machine Learning) 學識分辨物品嘅軟件CLIP，其中有一部份就講到呢個軟件原來好易被人呃，例如任何物件嘅相，加上好多「$」，佢就會認為佢係一個豬仔錢罌；一蘋果痴咗張紙寫住「iPod」，佢就會以為真係一部iPod。

圖片：OpenAI

之所以會出現呢個結果，係因為CLIP不僅對「物件本體」有反應，同時對圖中出現嘅字、背景圖案等都有反應——亦即係同人腦運作相似——而目前CLIP嘅問題就出在「認到哂圖入面所有嘢，但唔識分邊樣先係重要」。換言之如果能夠解決呢個問題，CLIP會比目前已有嘅人工智能更為聰明、更貼近人腦嘅運作。所以大家唔使驚AI會取代人類…住。