日前Apple終於喺春季發布會推出傳咗好耐嘅藍牙追蹤器AirTag，又被網友稱為「捉姦神器」。雖然市場上早就有類似產品，但隨住AirTag問世預計將會掀起一股藍牙追蹤器風潮。近日微博上就流出兩張疑似OPPO藍牙追蹤器照片，睇嚟OPPO亦睇準商機打算推出類似產品。

根據微博博主「數碼閒聊站」貼文，OPPO打算推出同樣基於超寬頻（UWB）技術嘅藍牙追蹤器，而且聲稱比AirTag換電式設計更環保，能夠透過USB-C接口充電，外觀同尺寸上就同AirTag所差無幾。OPPO官方暫時未有公布相關消息，但預計如果OPPO推出類似產品，接著落嚟小米及其他中國品牌都會加入風潮。

其實好多年前已經有類似產品，例如美國品牌Tile，而Samsung亦喺今年1月推出咗Galaxy SmartTag。如今科技界龍頭公司Apple帶起風潮，令類似產品再次引起市場熱度。