大家冇睇錯，亦都唔係改圖嚟！近日德國殿堂品相機品牌Leica同SoftBank合作，推出自家首部智能手機「Leitz Phone 1」，由德國團隊親自操刀設計，採用啞光黑色背蓋及銀色邊框，並喺機背右上角嵌上紅色經典Logo，整體充滿濃烈「Leica味」。

雖然外型就承傳咗Leica血統啦，但話晒都係一部手機，規格都非常重要嘅。根據官方資料，Leitz Phone 1規格同早前Leica x Sharp合作推出嘅Sharp AQUOS R6非常相似，同樣搭載 Snapdragon 888 CPU、12GB Ram+256GB Rom、6.6吋Pro IGZO OLED曲面螢幕（120Hz刷新率、解像度2,730x1,260），支援Qualcomm 3D Sonic螢幕指紋辨識，以及5000mAh電池容量同IP65/68防水防塵。

除咗機身硬件規格同AQUOS R6相似，就連後置主鏡頭都同樣採用2,020萬像素1吋感光元件、Summicron f/1.9 7P光學鏡片，前置鏡頭則係一個1,260萬像素自拍鏡頭。不過唔同嘅就係Leitz Phone 1具備Leitz Looks模式，可以拍出Leica風味嘅黑白照片，而官方亦好貼心咁附送一個磁吸式銀色金屬鏡頭蓋，等用家唔用相機嗰陣可以笠翻個蓋保護鏡頭。

Leitz Phone 1定價為187,920日元（約$13180港幣），今日起開放預購，7月底起正式發貨。不過暫時限定日本發售，未知將來會唔會喺其他地區推出，有興趣嘅朋友可能就要買水貨啦。