相信大家喺科幻片都見過唔少識飛嘅汽車互相較技，隨住近年電動飛行技術發展迅速，睇嚟電影情節即將成真！近日電動飛行賽車公司Airspeeder旗下飛行汽車（定應該叫飛機？） Alauda Mk3完成首次無人試飛，並計劃最快喺今年年底舉行首場比賽。

企業家Matthew Pearson於2019年創立Airspeeder及Alauda Aeronautics兩間公司，前者負責飛行賽車業業，後者為製造商，旨在製作出以競速為目標嘅載人飛行器。雖然Airspeeder強調佢哋係製造「飛行汽車（Flying Car）」，但事實上部機就冇車轆嘅，亦唔可以喺地面駕駛，準確啲嚟講應該叫做電動飛行器？

呢部飛行汽車Alauda Mk3重量為130公斤，最速時速可達200km/h，能夠喺2.8秒內從0km/h加速到100km/h。MK3主要靠一個可拆卸電池提供能量，每次飛行時間約10-15分鐘，所以喺比賽嗰陣就會同一級方程式一樣，跑幾圈就要入維修站維修，只不過佢就唔係換轆，只喺換電池。另外，MK3亦配備上LiDAR（光學雷達）及傳統雷達，能夠避免「撞機」情況發生，目前已完成首次無人試飛，預計今年年底舉行首場非載人比賽，屆時會有4支隊伍參賽，每隊各有2位車手（飛機師？）遠程控制MK3，並最快喺2022年舉行首場載人駕駛比賽。

資料來源：theverge、airspeeder