相信大家細個都遇過一啲朋友，一唔夠你講嗰陣佢就會不斷重複你每一句說話，講到你冇癮投降為止。最近有外媒就發現美國海軍研究緊一款類似嘅武器，當接收到目標人物說話後，個裝置就會播返兩次出嚟，第一次係即時性，第二次就會遲少少先播，繼而令對方感到困擾停止說話。

AHAD裝置圖。（圖片截自：autoevolution.com）

據外媒報導，呢款名為「Handheld Acoustic Hailing and Disruption（AHAD）」嘅裝置早喺2019年公布專利文件，只不過直到最近先被發現。其外型睇落就好似一個衞星電視天線，由鑊形反射碟、咪高峰以及超音波喇叭組成，當長距離指向性咪高峰接收到目標人物聲音，裝置就會將聲波放大並透過指向性喇叭播放。

目前美國海軍亦有使用各類「聲波武器」，以作驅逐用途。

由於裝置會分別重複播放兩次，一次即時，另一次慢半拍，令目標人物產生一種叫做DAF「Delayed Auditory Feedback（延遲聽覺反饋）」嘅效果，正常人聽到都會覺得分心同困擾而停止說話，同時亦因為用上指向性喇叭，所以旁邊嘅人只會見到當事人好似中咗邪咁講唔到嘢。

運用DAF技術嘅口吃矯正儀器。

事實上DAF技術一直被廣泛應用於治療口吃，由於大部份患者跟住其他人講嘢嗰陣能夠大幅改善口吃情況，所以好多口吃矯正醫療器材都用上DAF技術，但對於正常人嚟講就係極度困擾。