唔少有養寵物嘅朋友，都會喺屋企裝返個Cam嚟觀察愛犬/主子，但如果想睇晒全間屋，往往都要破費裝多幾個Cam，有冇方法一件產品搞掂？日前Amzon宣布即將推出家用無人機監視器「Ring Always Home Cam」，用戶可以透過專用App即時串流畫面，監視屋企每一個角落，仲可以設定指定路線等佢自動巡邏拍攝。

據官方介紹，Ring Always Home Cam搭載高畫質鏡頭，能夠拍攝1080P影片，只有飛緊嗰陣先會開啟鏡頭，確保唔用嗰時唔會被監視。另外，無人機能夠整合其他Ring產品嘅警報系統Ring Alarm，只要有人闖入屋企，無人機就會即刻飛去事發點拍攝，但前提係大家屋企門窗有安裝其他Amazon Ring防盜產品。而且佢同吸塵機械人一樣，飛完指定巡邏路線就會自動返去叉電座叉電。

Ring Always Home Cam售價為249.99美金（約$1,945港幣），即日起開放指定用戶訂購，預計今年秋季正式上架。