Jeff Bezos旗下太空科技公司Blue Origin，今年兩度完成載人太空旅遊任務引起全球關注，不過高瞻遠矚嘅（前）首富又點會咁易滿足呢？佢日前就宣布即將興建一座私人太空站「Orbital Reef」，結合觀光、研究、商業等多種用途，預計最快2025年投入使用。

據Blue Origin新聞稿所講，呢個名為「Orbital Reef」嘅太空站內部空間國際太空站相似，最高可以容納10人，由Blue Origin、波音以及新創公司Sierra Space合力興建。太空站將會採用開放式接口設計，方便來訪嘅飛船停靠以及未來擴充，而且入面會有太空花園、娛樂設施、面向地球嘅大窗戶，等大家可以上去觀光住宿。

雖然Blue Origin預計太空站將於2025-2030年投入使用，之但係呢，佢哋其實未發射過任何裝置入軌道，唔知咁短時間內追唔追得上進度呢？