如果講起最硬淨嘅手機，相信唔少人第一時間都一定會諗起Nokia品牌，因為佢舊式嘅機種基本上點跌都唔爛，甚示被人笑稱係「最強武器」，足以證明大家對Nokia手機嘅印象絕對係最耐摔的。但係如果我話你知，而家嘅iPhone其實比Nokia手機更加耐摔，你又信唔信?

近日，網上就有人拎Nokia 3310與iPhone 13 Pro進行一對耐摔對決，位置於20層樓嘅高度進行，兩部手機將於同一高度往下直摔，睇下邊部更加耐摔。

相信你一定會以為兩邊都係玻璃嘅iPhone點可能更加耐摔，基本上一跌個mon就爆/壞啦師兄，Sorry咁你就真係大錯特錯啦。

喺第一次嘅摔機測試，iPhone 13 Pro用上原廠嘅MagSafe保護殼，但結果一撞之下保護殼直接爆飛，而其背面玻璃基本上全碎(你呢一刻肯定心諗: 都話架啦)，但估唔到嘅係其正面屏幕完全無任何碎裂，而拍攝鏡頭亦可以繼續正常運作。

另一邊廂嘅3310，一撞之下直接散晒，無論外殼、電池、按鍵等散落一地，不過測試者卻未有將佢重組，呢個位令到今次測試產生懸念，因為要知道Nokia手機有機會散晒砌番埋都可以用的。

而測試完第一次仲唔夠喉，第二次再摔之下，iPhone 13 Pro嘅機背碎得更誇張，內部零件亦己經顯露出黎，但令人完全估唔到嘅係屏幕同相機依舊可以正常使用。正所謂一不離二，二不離三，iPhone 13 Pro再被人丟多一次落樓，今次相機鏡頭終於壞啦，但屏幕就竟然繼續可佞正常使用。

係咪估唔到呢? 其實如今嘅iPhone 13系列屏幕採用「超瓷晶盾」玻璃材質，官網介紹呢樣材質係有4倍抗摔能力，咁樣就足以證明點解屏幕無爆。不過相反，iPhone嘅手機背部卻可能係佢嘅致命傷。