為咗將來可以殖民月球興建基地，最近NASA就研究緊點樣將核反應爐送上月球，從而減少對太陽能嘅依賴。目前正公開徵集設計方案，出年2月截止，有冇有能之士可以幫幫NASA手拆掂佢？

核反應爐概念圖（圖片截自：NASA）

據了解，呢個項目係由NASA及美國能源部（DOE）提出，希望可以喺月球上設置一個唔依賴太陽能嘅能源系統，為日後人類喺月球生活及研究提供電力。按照目前計劃，反應爐會喺地球興建好再送上月球，當中包括鈾燃料反應爐爐心、將核熱能轉化為電嘅系統、保持反應爐冷卻嘅系統，以及一個可以連續供電10年，提供唔少於40kW電力嘅配電系統，相等於可以為30個家庭供電10年。

另外，呢個系統必須能夠喺冇操作員嘅情況下自動開關，支持遙距控制，而且方便運載到月球唔同位置供電，同時放得入直徑4米，長6米嘅運載火箭，重量唔超過6,000公斤。如果大家冇咩概念，尺寸就大約好似上面張概念圖咁樣。若然成功嘅話，NASA仲會考慮直接喺月球興建核電廠，為人類提供探索星際所需嘅電力。