近期科技界最熱爆話題莫過於「元宇宙」，大家能夠透過VR或AR裝置，喺虛擬世界作出現實做到或做唔到嘅事，識朋友、玩遊戲、飛天遁地，甚至乎返工都冇問題。然而，極高自由度亦伴隨住唔少隱憂，最近Meta旗下虛擬社交平台Horizo​​n Worlds就出現咗一宗性騷擾事件，有位女測試員聲稱自己喺虛擬世界被慘遭一名陌生人「鹹豬手」，其他旁觀者唔單只冇挺身而出，更支持呢種行為，令佢感到孤立無援。

據《New York Post》報導，日前一名女測試員喺Horizon Worlds測試群組訴說一件不愉快經歷，表示自己上個月喺Horizon Worlds遊玩時，突然被一位陌生人「鹹豬手」，旁觀者無幫手之餘仲要支持呢種行為，令佢感到非常無助。平台副總裁Vivek Sharma得知事情後隨即發聲明表示感到難過及遺憾，同時提醒用家受威脅嗰陣可以開啟一個叫「Safe Zone」嘅保護功能，開咗之後就冇人可以掂你、同你傾計以及其他方式嘅互動。

今次事件反映虛擬世界雖然自由，但同時存在唔少隱憂，若然所謂嘅元宇宙最終目標係建構一個仿照現實嘅虛擬社會，咁社會各界無可避免要思考一下應該透過咩方法約束或監管用家嘅行為（又或者唔應該管？），出現糾紛又應該點樣處理等等，否則到時有咩事就會相當頭痕。唔知大家又有咩睇法呢？