擺脫傳統電網 Tesla出「家用尿袋」?

文：MenClub 魏文青　　圖：互聯網
POSTED ON 04 May 2015

講起Tesla，你可能會直覺地覺得佢係一間「汽車生產商」－－縱然佢出開嘅車同「汽」冇咩關係。但如果我話你知Tesla其實係一間電池公司，黎緊仲會推出改變世界嘅「家用尿袋」，你又點睇？

當然，呢個尿袋就唔係用黎你平時陀住黎叉電話。呢款名為「Powerwall」嘅家用掛牆式電池組，長130cm、闊86cm、厚18cm，可以提供7度(kWh)或10度電，價錢就分別為3000與3500美金。根據Tesla CEO Elon Musk，呢組儲電系統可以成為家用後備電源，在電力不穩時繼續推動雪櫃、燈光等必需家用電器。此外，喺外國某些地區的電費會因應時間不同而有所改變，Powerwall亦可以在電費低的時間(如中午)先儲電，留待電費高嘅時間再使用以節省電費。如果配上住宅太陽能版，甚至可以完全擺脫傳統電網。

至於更高階嘅「Powerpack」則由能提供100度電的電池組堆疊而成，最多更可以砌出1000度電的電池組。Elon Musk指Powerpack可以用於商業、工業甚至基建層面。佢更指「只需」1.6億個Powerpacks，就能取代整個美國傳統電網；而20億個，就可以供應足夠電力予全世界。

Elon Musk指「Powerwall」與「Powerpack」將會於Tesla位於內華達州的超級鋰電池廠「Gigafactory」生產，並於3、4個月內正式推出，並期望可以「從根本改變世界使用能源的方法」咁話。