唔少人都會夾埋幾個朋友共用一個Netflix帳號，但之後就冇呢支歌仔唱喇，事關Netflix今日正式宣布將對「非同住者」共用帳號收取額外費用！

Netflix早前喺拉丁美洲率先試行嘅打擊共享帳號措施，由今日起正式擴展至美國、英國、台灣、香港等全球100多個國家及地區。若然要將帳號Share畀非同住成員，將收取額外費用。

據Netflix官網顯示，目前只有月費HK$78「標準」以及月費HK$93「高級」方案能夠新增非同住成員，前者能夠新增1位，而後者則可以新增2位，每位額外成員每月費用為$28，而月費HK$63嘅「基本」方案就無法新增額外成員。至於如何查核非同住用戶，官方就表示會根據IP位址、裝置識別碼以及帳戶活動等多種資訊判斷。

據外媒《Bloomberg》報導，Netflix自今年2月於西班牙推出相關措施後，流失超過100萬名用戶，當中有3分2人係使用共享帳號。唔知用緊Share帳號嘅網友，會打畀多啲錢，定索性唔睇呢？