WhatsApp係每個香港人最常用嘅通訊軟件，做嘢用佢、溝女用佢、有時甚至連買嘢都係用，一日收發一千幾百個訊息絕非難事。但大量訊息嘅其中一個反效果，就係往往會唔記得與某人或某個群組對話中嘅重要資訊，尤其如果對方使用語音訊息，就連Search都Search唔到出黎，事後要搵返有如大海撈針。不過近日WhatsApp就推出「訊息置頂」功能，相信可以幫大家解決呢個問題啦。

新推出嘅「訊息置頂」功能可以用於任何單對單及群組對話，大家只需要長按你想置頂嘅訊息，再選擇「置頂」，該訊息就會被置頂於對話窗嘅頂端，並會以單行顯示部份訊息內容。而如果你撳落置頂欄，對話窗就會自動跳到被置頂嘅訊息原文，非常適合用黎標記對話中嘅重要訊息。

訊息嘅預設置頂時限為7日，但用戶亦可於24小時、7日及30日中自行選擇。而置頂功能亦支援文字訊息、投票功能、多媒體檔案及表情符號等所有訊息類型。群組管理員亦可以選擇是否容許其他成員將訊息置頂。

資料來源：WhatsApp