近年華為一直被西方國家視為國家安全威脅而被封殺，當中美國自2019年5月就將華為及70家附屬公司列入黑名單，令華為於北美嘅發展幾乎停滯。而近日《日本經濟新聞》就引述消息人士指，華為近月逐漸裁減其北美公關及政府關係團隊，換言之華為似乎放棄於北美繼續進行遊說。

據《日經》報導，華為近月逐漸裁減北美公關及政府關係團隊，其中有數人係於新年後離職。雖然牽涉嘅員工數目不多，而且僅有數名經理級別員工，但由於部份離職員工為華為工作近十年，加上目前嘅中美關係，唔少人都將華為此舉視為「放棄掙扎」。據知華為於2019年首次被美國列入黑名單、以及時任華為CFO孟晚舟被美國政府拘留後，就開始大力於美國政界進行遊說。

前華為公關經理Chris Pereira接受《日經》訪問時指，華為裁減北美公關團體係意料中事。事關當年北美團隊嘅主要目的有兩個，一係遊說釋放孟晚舟，二係於美國市場有所突破。而孟晚舟早於2021年就已被釋放，美國市場卻因中美關係而無甚進展。「如果睇收入，北美市場對華為而言唔太重要。如果以商業層面估計，我認為華為會集中於中東、東南亞，又或南美、東歐等市場。」

資料來源：Nikkei