由Rockstar開發嘅《GTA 6》早前宣佈延期至明年5月推出，但因為Rockstar遊戲過去有多次延期嘅「慣例」，所以目前大家新發售日依然抱住觀望態度。而近日Rockstar母公司Take-Two嘅CEO Strauss Zelnick接受《IGN》訪問時，就被問到《GTA 6》能否於明年5月準時推出，對此Strauss Zelnick畀出一個頗為保守嘅答案：「通常都會」。

圖片：Wikicommons

據《IGN》記者Wesley Yin-Poole報導，近日佢於Take-Two年度財政報告發佈會上訪問到CEO Strauss Zelnick，並就《GTA 6》延期一事向對方提問。Strauss Zelnick指：「當我哋接受完成一款追求完美嘅遊戲時，我哋就越清楚是否需要花更多時間進行細節打磨。喺《GTA 6》呢單嘢上，我哋認為有機會可以用多少少時間，去確保Rockstar可以不受限制地完成佢哋嘅創作願境。咁我個人黎講亦當然支持啦！」

同時Strauss Zelnick亦指出：「延期令我都好痛苦，點會唔痛呢？但最緊要嘅係支持你嘅團隊去追求完美。」

考慮到《GTA 6》延期肯定會影響Take-Two本年度嘅財政報告，而後者就係CEO嘅最主要業績之一，Strauss Zelnick咁都願意支持遊戲延期發售，都算真係對遊戲有愛。但接下來更重要嘅問題就係，「明年5月」呢個發售又係咪真嘅呢？Strauss Zelnick表示：「從過去嘅經驗黎講，當我哋講到明發售日嘅時候，通常我哋都可以達到目標嘅！」換言之大家對於「明年5月」呢個發售日可以有多些少信心啦！

資料來源：IGN