人去到某個歲數，就不能免俗地要考慮起身後事，就算你係世界著名遊戲製作人亦不能免俗。例如小島秀夫日前接受訪問時，就提到自己為「小島工作室」留下一隻「想法USB」，希望員工於其百年之後都仍然可以從中開發新遊戲，不至於只能不停食老本。

圖片：hideo_kojima on IG

據外媒《VGC》報導，現年61歲嘅小島秀夫早前為咗宣傳《Death Stranding 2》而接受《Edge Magazine》訪問，當中就被問到「60歲」對於其創作生涯嘅影響。小島秀夫則表示，比起自到達花甲之年，對佢黎講更有衝擊力嘅係幾年前嘅疫情。佢表示疫情之前根本就唔覺得老，認為自己可以一路創作落去，但疫情期間佢唔單止病得非常嚴重、仲咁啱要做個眼部手術，同時又因為身邊唔少人都相繼離世而直面死亡，於是令佢開始反思自己「究竟仲有幾多時間去創作遊戲或者電影？最多十年？」

去年年初Sony同小島秀夫宣佈開發《Physint》

得出結論之後嘅小島秀夫決定好好利用剩餘時間。例如佢知道好多Fans一直都希望佢推出類似《Metal Gear》系列嘅作品，所以佢就同Sony合作開發《Physint》；同時佢亦考慮到自家「小島工作室」嘅未來，指自己留咗隻記錄自己大量想法、「有啲似遺囑」嘅USB畀私人助理，「就算有日我離開咗，或者佢哋都可以從中搵到想法繼續製作新遊戲……呢個係我嘅恐懼，如果有日我走咗咁小島工作室點算呢？我唔想佢哋淨係可以營運目前嘅遊戲。」

資料來源：VGC