隨住AI技術及應用方式越黎越普遍，相信大家於日常生活甚至工作中都或多或少會使用AI，甚至會講到明被人知你有用。但根據一個美國新研究，「揭露使用AI」原來會令外界降低對你嘅信任度，但唔講然後被人發現嘅後果更差，令「話唔話畀人知有用AI」成為企業面對嘅兩難局面。

圖片：ImageFX

來自史丹福大學社會科學研究院信任研究中心嘅主管Oliver Schilke，早前發佈咗一篇關於揭露AI使用嘅研究。據佢前前後後搵黎超過5,000名受訪者、做過13次調查後發現，只要承認有使用AI協助工作，就會令到外界對你（或者你公司）嘅信任度降低。更重要嘅係，即使係熟悉科技、對科技有正面感覺嘅受訪者，都一樣會因為某人或某企業使用AI而降低其信任度。簡單黎講就係只要知道你有用AI，人哋就冇咁相信你。

研究指出信任度降低嘅背後原因，好可能係現時嘅人依然認為「寫作」、「創意」、「思考」係人類嘅事，而當使用AI取代人類去做呢啲嘢時，成品睇落就似乎冇咁「真」，繼而影響可信度。

圖片：ImageFX

但你又唔好以為用咗唔話畀人知就係解決方法喎！因為同一個研究顯示，你用咗AI唔講，然後被人發現，對信任度嘅打擊先係最大。換言之目前似乎只能夠於「主動講明有用AI，接受信任度下跌」以及「唔主動講，但萬一被人發現信任度暴跌」中二選一。

但研究亦提出，未來當AI更進一步成為主流，去到人人都有用都要用時，呢個「AI透明度懲罰」或者會減輕甚至消失。但呢一日究竟會唔會黎到、又會幾時黎到，就要大家慢慢體驗啦。

資料來源：The Conversation