自從大部份遊戲都會於多平台推出之後，玩家們可以被粗分成兩大陣營：追求極致畫面、而且唔介意花錢花時間去升級、研究硬體配置嘅PC玩家；以及對畫面要求稍低，希望買返黎即插即用嘅主機玩家。而過去幾年因為Playstation 5出貨緩慢、加上疫情期間在家工作嘅需求，唔少主機玩家都改投能一機多用嘅PC懷抱。不過據德國嘅一個最新調查，主機玩家嘅人數正節節上升，反觀PC玩家嘅人數就不停下跌，似乎證明主機重新成為玩家們嘅主流選擇。

據《Game.de》日前發表嘅報告，德國遊戲工業協會利用國際數據及分析組織《YouGov》嘅數據，整理出過去數年德國各個遊戲平台嘅人數變化。當中排名第一嘅依然係手機玩家，2024年總玩家人數為2290萬人，比起2019年嘅1950萬人增長近15%，但若果與2023年嘅高位2350萬人相比，則係下降2.5%左右，顯示其玩家人數正處於平穩發展。

另一邊廂，主機（包括Playstation、Xbox及Switch）玩家人數卻從2019年嘅1590萬，驟升至2024年嘅2050萬，增幅近三成。而PC玩家人數則由2019年嘅1630萬，降至2024年嘅1310萬，跌兩成。

縱然報告無直接表明主機玩家增長嘅原因，但就提到過去幾年間Playstation、Xbox及Switch均有推出性能更好嘅版本，如PS5 Pro及Switch OLED等「進一步改善遊戲體驗」。而PC主機嘅下跌嘅原因，則似乎因為顯示卡等零件炒風盛行，變相推高組裝高性能PC嘅金錢又或時間成本，相較之下主機就平易近人得多。

資料來源：game.de