曾幾何時「被騙裸聊」乃係相當「流行」嘅網絡騙案手法之一，而且入世未深、容易受奸人誘惑誤導嘅年輕人更係主要受害者之一，有見及此，早前Apple就公佈會於iOS 26中推出「FaceTime自動防裸聊功能」以保障年輕使用者。不過近日有人發現，相關功能似乎適用於所有FaceTime使用者，而且仲引起新一輪嘅私隱議論。

上月公佈iOS 26之時，Apple就指出會加入一系列適用於未成年使用者嘅「通訊安全（Communication Safety）」措施，當中包括「當偵測到FaceTime通話中出現裸露畫面時會適時介入，同時會為共享相簿中嘅裸露照片打碼」。而近日經「iDeviceHelp」實測iOS 26 beta，前者具體嘅操作係當偵測到FaceTime通話嘅畫面中出現裸體時，會自動凍結通話，並跳出警告字句，提醒用家可以即時結束通話。

圖片：@iDeviceHelpus

雖然大部人都明白Apple此舉嘅用意良好，但亦同時產生一系列新疑問。首先，唔知係因為Bug嘅關係定咩，目前呢個「凍結裸體通話」嘅功係適用於所有用家，換言之哪怕你係完全清楚自己做緊咩，例如係打算同遠距離中嘅伴侶來點刺激嘅成年人，一樣都會收到相關警告，於是就令部份用家認為Apple管得太多，甚至有侵犯或審查用家私隱之嫌。

另一個爭論點，就在於Apple係點樣得知畫面出現裸體繼而凍結通話呢？而據Apple目前嘅描述，「通訊安全功能」係透過裝置本身分析及偵測判斷視訊或照片中是否包含裸露內容，相關嘅內容唔會離開裝置，Apple自然亦無法獲取實際嘅內容。

資料來源：9to5Mac