《Bloomberg》著名記者Mark Gurman近日撰寫有關Apple嘅新報導，當中非常詳細地列出Apple今、明兩年即將會推出嘅所有新硬件，以及與現有型號嘅不同之處，換言之如果大家信佢嘅話，就可以決定究竟係依家買機、定係繼續等落去。

傳聞中嘅iPhone 17 Pro 背面設計

從Mark Gurman嘅報導整理，Apple首先會於今年秋季嘅「例行」發佈會中公佈iPhone 17系列，當中包括全新設計、我哋早前都有報導過嘅Pro系列。而同一個發佈會仲會公佈新款入門及高階Apple Watch各一、新嘅iPad Pro以及性能提升嘅Apple Vision。

而明年嘅2月，Apple就預計會推出今年年初首次發佈嘅iPhone e系列新機iPhone 17e。據報iPhone 17e嘅外表與iPhone 16e分別不大，最大嘅唔同在於會跟隨今年秋季發佈嘅iPhone 17系列，改用新嘅A19處理器。假若傳聞屬實，亦表示Apple將會一改以往平價iPhone系列（即係SE）要幾年先更新一次嘅慣例。iPhone e系列有望成為「年更」產品。

Macbook Pro

圖片：Apple

iPad方面，新iPad Pro就有望於今年10月推出，並將會升級至M5處理器。而明年3至4月，Apple據報就會推出iPad及iPad Air嘅新型號。兩者與目前型號嘅分別都係在於更新處理器，其中iPad會用上比起目前A16更強大嘅處理器，但目前未知實際會用到A17至A19中嘅邊款；後者就會由目前嘅M3升級至M4。除此之外兩者唔會有其他重大升級。

Macbook系列嘅情況亦類似。Mark Gurman指原定今年內推出嘅新14及16吋Macbook Pro將有機會延遲至明年初。屆時將會使用M5處理器及OLED螢幕。Macbook Air 13及15吋則會於明年上半年推出，目前未知有咩實際升級。

另外據報Apple亦會於明年初推出Apple Studio Display嘅後繼款式；而原定今年3月推出，但因應新Siri開發問題而延期嘅新智能家居控制裝置，亦預計會於明年上半年推出。

資料來源：Bloomberg