為應對蘋果iPhone 17系列，小米近日宣布提前在本月發布全新旗艦手機，並直接跳過小米16，命名為小米17系列，就連以往最高階嘅型號「Ultra」都改名叫「Pro Max」。小米創辦人雷軍更直言，小米17系列就是要「全面對標 iPhone，正面迎戰！」官方喺今日就率先揭曉小米17 Pro外觀細節，可見機背採用類似iPhone 17 Pro嘅橫向巨大相機模組設計，但上面仲內嵌咗一塊螢幕。

據官方介紹，呢塊名為「妙享背屏」嘅副螢幕，唔單只可以顯示時間、圖片及通知，仲可以當作相機取景器，方便用後置鏡頭自拍，帶來更多互動新玩法。除咗外觀革新，小米17系列更會全球首批搭載高通Snapdragon 8 Elite Gen 5處理器嘅手機，性能表現令人期待。

值得一提嘅係，其實小米早於2021年嘅Mi 11 Ultra已經試過喺機背加入螢幕，當時都可以用嚟做相機取景器，顯示時間、電量及通知等，但受限於螢幕尺寸（1.1吋）同功能，實際應用場景比較有限。相比之下，今次小米17 Pro嘅「妙享背屏」就大得多，應該可以帶嚟更多實用同創意嘅玩法。