《Bloomberg》記者Mark Gurman透露，Apple將會延續入門級機型「e」系列，預計在2026年上半年推出iPhone 17e。但今次呢部新機將會同iPhone 17標準版分別更加明顯，唔會重蹈iPhone 16e同iPhone 16規格與價格太相似嘅覆轍，避免市場定位模糊與混亂。

Apple在今年初為iPhone陣容加入「e」系列，取代以往嘅「SE」成為全新入門級iPhone選擇。然而，由於iPhone 16e同iPhone 16標準版只相差200美元，而規格上就差在缺少1個GPU核心、冇廣角鏡頭、不支援MagSafe，以及16e只有黑白兩款配色等等。對於用唔著上述功能嘅消費者嚟講，慳返200美元就能夠加入iPhone大家庭，認真超值；但同時亦有另一部份人覺得，買16e倒不如加多少少買iPhone 16，令到佢嘅定位相當尷尬及模糊。對此，Mark Gurman就指出，明年推出嘅iPhone 17e，將會同標準版iPhone 17差異更大，更凸顯出其作為入門級機型嘅定位。

據最新爆料，iPhone 17e將採用iPhone 16標準版同款嘅6.1吋OLED螢幕（靈動島設計）、刷新率為60Hz，而處理器則由A18升級至A19晶片，相機方面就繼續使用4800萬像素單鏡頭設計。相反，今年新推出嘅iPhone 17標準版就升級咗唔少，螢幕由6.1吋升級到6.3吋並支援120Hz刷新率ProMotion技術，搭載全新A19晶片提供更強效能，而後置相機嘅廣角鏡亦從1200萬像素升級至4800萬像素，並支援更高功率嘅充電器以及續航時間更長。若然消息屬實，iPhone 17e將會比標準版iPhone 17顯得更加入門。