自從去年推出Meta Ray-Ban大獲好評之後，Meta於智能眼鏡領域可以話有領導性地位。不過早前一直有傳Apple有意進軍智能眼鏡市場同Meta競爭，而近日又有傳Meta有意於今年內推出智能手錶，與有Apple Watch等廠商競爭。咁點解本來整眼鏡嘅要出錶、本來出錶嘅就要去整眼鏡呢？據媒體分析指，其實係想構成一個完整嘅穿戴式裝置生態圈。

AI生成示意圖

圖片：ImageFX

話說Meta上年推出Ray-Ban Display智能眼鏡時，同步附帶咗一條「神經腕帶」（Neural Band），用家可以靠手腕上嘅皮膚感測動作，將手部動作轉化成控制眼鏡嘅指令。不過呢條神經腕帶目前只能配合Ray-Ban Display眼鏡使用，功能相對單一。而Meta CTO Andrew Bosworth早年接受CNET訪問時就已經暗示，既然神經腕帶都係要戴喺手腕，最終係有機會演化成一隻完整嘅手錶，加入健康追蹤、AI助手等功能，令隻手錶唔只係眼鏡嘅遙控器，而係一個獨立嘅可穿戴設備。

而目前傳聞中代號為「Malibu 2」嘅智能手錶，就好可能係上面呢個說法嘅實際行動。加上傳聞中「Malibu 2」將會與新Meta Ray-Ban一同於9月舉行嘅Connect發佈會中公佈，兩者之間能夠一同使用似乎亦非常合理。

Meta Ray-Ban

圖片：Meta

有趣嘅係，近來一直有傳聞指Apple有意推出自家嘅智能眼鏡，最快可能明年推出；據報Google亦會於今年推出自家AI 智能眼鏡，同樣可以配合Android智能手錶使用。換言之不久嘅將來，可能會有至少三個科技鉅頭進軍「眼鏡+手錶」嘅智能穿戴裝置市場。

資料來源：CNET