如果你有見過啲一齊好耐或者結咗婚好耐嘅情侶，你或者會聽過有人讚佢哋越黎越似樣，好似越黎越似樣就係恩愛嘅象徵咁。但根據最新研究，唔單冇證據證明情侶一齊得耐就會變得似樣，反而係越黎越唔似先真。

首先能夠肯定嘅係，能夠成為情侶甚至夫婦嘅兩個人，本身都一定會有啲相似。基於人類本身就會對「與自己相似嘅嘢」特別有好感，所以搵另一半時都不知覺地傾向搵啲價值觀、家庭、教育、宗教背景、以至外貌都同自己相似嘅人 (同理，對方亦會被你吸引)。另一邊廂，兩個各方面都相似嘅人，於社會上亦比較有機會出現於同一個圈子 (即係你社工系畢業，好難識到個讀物理嘅人架嘛)，於是又更有幾會認識並發展成為情侶。所以情侶之間本身就有好大機會相似。

同時早年亦有研究，指由於兩個人長期生活，大家同喜同悲，久而久之就會建立出同樣嘅皺紋，特別係眼紋、法令紋之類，就會令到兩個人越黎越似樣。

但根據史丹福大學研究員Pin Pin Tea-makorn及劍橋研究員Michal Kosinski嘅研究，就發現情侶們雖然本來就似樣，但唔會隨住一齊得耐而變得更加似樣。而隨住網上交友越黎越普及，本身存在嘅文化、種族、地理阻隔亦慢慢被打破，於是情侶間本身嘅相似度亦隨之下降。換言之整體而言，未來可能會更難聽到「嘩你兩個一齊咗之後越黎越似樣」呢句嘢。