「戒J」呢個話題，素來於「連登」中有一席之地，而踏入11月，亦係Reddit討論區嘅「No Nut November」戒J月。據戒J嘅支持者講，戒J可以增強體力、集中力、睪酮分泌諸如此類，總之就係好似戒毒咁對身體有百利而無一害。不過有專家就持相反意見，唔單止話戒J其實冇咁神奇，仲勸大家喺疫情期間千祁唔好戒J。

被我哋多次引用嘅美國兩性專家Dr. Lehmiller於個人網頁嘅一篇文章中說明，目前其實係冇任何研究顯示，戒J係對人體健康有任何正面影響，甚至我哋聽慣聽熟，運動員於比賽前要禁慾嘅習慣，Dr. Lehmiller都話係冇科學根據。換言之戒J本身除咗減少廁紙用量，基本上冇咩好處。

但另一方面，定期打J反而係對人體有好處。Dr. Lehmiller指過去曾有研究指出定期高潮及射精，能夠減低男性患上前列腺癌嘅風險；而女性定期自慰亦可以減輕經痛嘅狀況。另外亦有研究指自慰能夠減輕頭痛、背痛等慢性痛楚。

而除咗生理上嘅好處，自慰對心理亦有正面影響，例如唔少人會不自覺地將自慰當成減壓嘅方法之一，亦有研究顯示係有效嘅。另外亦有研究指女性同樣會用自慰作減壓方法，並真係有助減輕壓同更容易進入睡眠。

而正正就係自慰有減壓嘅作用，喺呢個大家都因為疫情而累積大量壓力嘅情況下，就唔應該強行戒J，令自己失去一個有效嘅舒壓方式，甚至應該加以鼓勵，希望大家幫助大家減壓。