一般黎講，我哋都覺得日本女仔去做AV女優，唔係為興趣，就係為咗錢，而且通常都係後者佔嘅比重更高——諗諗下我哋又何嘗唔係…Anyway——而我哋亦一直有個印象做AV女優可以搵大錢、搵快錢，不過據著名AV女優白石茉莉奈 (白石媽媽) 於個人Youtube上指，其實依家做AV女優已經搵少咗好多。佢亦透露自己14歲時就曾經一日搵到2000萬Yen。

卻說白石媽媽早前開設個人Youtube，而喺上星期嘅一條片中，佢就講到「目前為止最高收入嘅工作」其實唔係成為AV女優之後，而係14歲時簽咗份為期一年嘅廣告合約，實際上拍攝只係得一日，但收到嘅錢就係以千萬計，如果換做其他物品，就係28,571碗拉麵，又或者當時嘅6部中古車。據台灣著名AV達人「一劍浣春秋」估計，就係大概2000萬Yen (約HK$150萬) 左右。14歲就搵緊呢個錢，真係令人難以理解佢後來點解會去咗做女優。

另外白石媽媽亦提到，就算單以AV女優嘅收入黎計，10年、15年前做AV優搵嘅錢，大概係依家做AV女優收入嘅5到10倍。佢話聽講以前啲前輩退休之後，買車買樓，甚至買島買山 (佢真係咁講) 嘅人都有，但就算依家嘅女優可以參加各種不同商業活動，甚至出國搵錢，但都冇可能有呢收入。至於原因，佢就話係因為依家實在有太多新人出道 (一年6000個) ，再加上盜版猖獗，而且近年因為奧運，日本當局大力打壓，令拍片限制變多，三者相加就令賣片嘅收入大減。所以佢就呼籲大家支持正版喎！唔知大家會唔會聽白石媽媽話呢？