如果問一個男人，有機會自己一個喺屋企會做啲咩，我深信「睇AV」一定係最多人揀嘅活動之一，甚至有人唔係「自己一個」同唔係「喺屋企」都一樣會睇AV，可以而知AV對於男性嘅吸引力有幾大！有人就會將呢種嗜好與毒品、賭博等相提並論，定性為上癮或心理病，仲有人呼籲大家要「戒除」呢個壞習慣。但其實呢個世界上根本就冇「AV上癮」呢回事。

根據世界精神病治療權威「精神疾病診斷與統計手冊 (DSM-5)」指出，要將一種行為定義為「上癮」係取決於人們嘅腦部活動。而雖然睇AV與吸毒、酗酒、賭博一樣，進行時會激發腦部分泌多巴胺等「快樂物質」，令人感到愉悅，但就唔會影響腦部於你進行其他活動時分泌「快樂物質」嘅能力。換言之，毒癮係指一個人冇咗毒品就冇辦法感到愉悅，而睇AV係唔會影響你打機時獲得快感，所以就定義上黎講係唔算「上癮」。

而根據美國加州大學精神病學研究員Nicole Prause指出，人們之所以覺得自己「AV上癮」，實際上係因為個人行為 (即係睇AV嘅習慣)與個人、社會、道德以至宗教價值觀有衝突，更甚者可能係其他心理疾病，例如抑鬱嘅行為表現，如果把「睇AV」當係心理或精神疾病去治療，反而係忽視咗真正嘅問題。